سير سير و الله غيجيب التسير

بوشعيب هارة –

رفعتو راسنا يا السبوعة

وقدام العالم خليتو راية بلادنا تلعلع..

كسبتو حب الروم و العرب

والكل من القلب يشجع..

رجعتو همتنا و شانّا

طولتو الرقبة والراس ترفع..

أسود الأطلس فرحتو كل المغاربة

نسا و رجال

الكبير والصغير ولي عاد كيترعرع..

هرات الكبدة وبالفرحة درفات دمعة

والهتافات ترسخات، في لسان كل مْوَلَّع..

سير سير والله شْكُرْ و عليه تْوَكَّل

والشكر موصول لملكنا الحبيب ولكل الشعب

وللركراكي ووليداتو

و منساوش القجع..

مدرسة الركراكي لازم تولي هدف

لكل من بغا للرياضة يصْرَع..

تّكْتَبْ إنجازاتها بماء الذهب

وفوق الرؤوس ترفع..

الْعزّ والنّْصَرْ لولاد بلادي

أسود الأطلس فالبَرّْ والْبْحَرْ..

الله حاضيكم

و يْمَكَّنْكُم في كل جولة من النّْصَر..

شرفتونا وخليتو الخصوم مغبونة

جْفاها النوم من حسرة العْمْر..

مجموعة متوازنة متخلقة ومتواضعة

سير سير أسد الأطلس، يلقاك التيسير..

سير سير هي بإذن الله مفتاح كل عسير..

العالم كلو واقف يشوف ويتمتع

بعروض فنية ممزوجة بأهازيج..

وبهتافات قُحَّة مغربية

شَكّْلُو أعذب مزيج..

سير سير خلِّي لْعْدُو فيهم يحير..

زغرتو يا المغربيات أُو كبرو الله تكبير..

راكم عطيتونا أسود فالميدان

فَرّْحُو أجمل أمير..

رفعتو رايتنا وعلّيتو شَانَّا بلا حدود

وخليتو الكل مبهور

و لروعة حضارتنا أسير..

كُلشي يسول “شكون هادو شكون”؟

هادو يا سْيادي أسود الأطلس

هادو الذهب المكنون..

أولاد السِّلم والسلام و أسود هاد الكون..

أسود الأطلس على نيجيريا فــــازوا

وصار الحلم بالكأس يقين..

وقفو لأُســــــود مغربنا وقفو،

راهم أبلوا البلاء الحسن وجدوا جاهدين..

أسود الأطلس الشجعان زيدو،

راه صار الكان بنا رهــــــين..

سمعو مزيان،

لازم تجيبو الكان باش ما كان..

راه تنظم فوق أرض الأحرار،

و لازم يبقا في هاد المكان..